226
Hvítusunnudag tað var,
Andin Halgi á foldum gisti,
ljós og ugga við sær bar,
myrkrið veldi sítt tá misti.
Bjartari skein halgi login
enn í fjøllum morgunroðin.
 
2. Losnaðu tá tungubond,
orðið barst at mannasálum,
síðani um heimsins lond
ljóðar tað á øllum málum,
fyri gomlum, fyri ungum
ljóðar tað á øllum tungum.
 
3. Biðjum vær og hevjum mál,
biðjum til tín, Halgi Andi:
Ugga hvørja særda sál,
myrkrið rek úr hesum landi.
Halgi Andi, ljós og gleði
birt á hvítusunnudegi!
 
4. Birt tú halga ljósið títt
bæði í skúla og í kirkju,
so tað lýsir reint og frítt
yvir mansins øllum yrki.
Góði Guð og Halgi Andi
lýsi signing yvir landið!
 
Símun av Skarði.
Lag: sum Sl. 174.