Eitt av lívsins undrum
Í morgun kom ein glaður næmingur í 4. flokki í skúla við eggum úr eini hønu, sum tey høvdu slaktað. Inni í hønuni funnu tey egg á ymsum menningarstigið.
Á myndini omanfyri sæst, hvussu eitt egg verður til, og hvussu tað mennist inni í hønuni.
Størsta eggið er tað til vinstru.Tað er klárt at verpa. Næsta eggið hevur bert hinnu, er bleytt og manglar skal.
Hini eggini eru enn bert blommur í ymsari stødd og á ymsum menningarstigi.
Tað tekur eini hønu góðar 24 tímar ella uml. eitt samdøgur at framleiða eitt egg. Tá er blomman gjørd frammanundan.
4 tímar fara til at gera hvítan, uml. 1 tími og 10 min. til at gera eggjahinnuna, ið er innan fyri skalið, og sum heldur hvítanum og blommuni upp á pláss, og uml. 19 tímar fara til at gera skalið.
Egggørnin í hønu er mest at líkna við eitt víndrúvutyssi við meira og minni búnum eggjum.
Størsta talið av óbúnum eggum/blommum, ið eru tald í eini hønu, er 3065. Tann hønan, vit vita um, sum hevur vorpið flest egg, varp 1515 egg tilsamans. Hon gjørdist 8 ára gomul.
So er spurningurin, hvat kom fyrst: eggið ella hønan! ????