21. februar hátíðarhildu vit 3‑ára føðingardagin hjá Bamsu, sum hevur verið ein partur av skúlanum í Leirvík seinastu trý árini. Bamsa er okkara felags vinur í Betri Vinir‑átakinum, har vit dagliga arbeiða við virðinum, sum Bamsa vísir okkum á: Tolsemi, virðing, umsorgan og dirvi. 

Tað gjørdist eitt satt yvirraskilsi, tá Bamsa brádliga kom á vitjan í stovurnar. Næmingarnir tóku ímóti við stórum smíli – og høvdu sjálvir gjørt føðingardagskort til Bamsu, sum tey handaðu Bamsu við stoltleika.

Dagurin var merktur av spæli, felagsskapi og góðum huglagi. Næmingarnir fóru á leyvuveiðu saman við Tóru, vit sungu føðingardagssangir, og Bamsa hevði sjálvandi okkurt gott við til øll børnini. Øll fingu høvi at siga tillukku við Bamsu, og tað var lætt at síggja, hvussu nógv tey gleðast um sín bamsavin.

Føðingardagurin hjá Bamsu gjørdist tí ikki bara ein hátíðardagur, men eisini ein vøkur áminning um, hvat Betri Vinir‑átakið stendur fyri: At vit øll kunnu gera mun – við einum smíli, einum góðum orði og einum vinarligum hugburði.